24zham.am-ը գրում է.

Բացառիկ հարցազրույց տրված ”MONA Luxury STUDIO”-ին

Ռենատ Ագզամովը, ով համարվում է Ռուսաստանի լավագույն հրուշակագործներից մեկը և ինստագրամյան իր էջում արդեն ունի միլիոնուկես հետևորդ, հայտնի է իր յուրահատուկ տորթերով, որոնք զարդարում են քաղաքական հայտնի գործիչների, բիզնեսի, մշակույթի եւ սպորտի նշանավոր ներկայացուցիչների տոները։ Սակայն հաջողության ճանապարհը, որը հրուշակագործն անցել է, ամենևին էլ դյուրին չի եղել, ինչպես կարող է հիմա թվալ, երբ չկա ազատում Ռենատի խոհարարական գլուխգործոցները համեմել ցանկացողներից:

Ռենատը պատրաստել սկսել է 7 տարեկանից: Նախ՝ թխվածքաբլիթներ, հետո՝ գերմանական կեքս՝ խոհարարական գրքից: Քանի որ նրա հայրը ազգությամբ թաթար էր, տանն անպակաս էին միշտ արևելյան քաղցրավենիքները: Հենց հայրն էլ սովորեցնում էր իր երկու տղաներին համեղ պատրաստել: Նա զարմանում է, թե այն ժամանակ ինչպես էր կարողանում ինչ–որ բան պատրաստել, երբ ստիպված էր ձեռքը մտցնել վառարանի մեջ՝ ջերմաստիճանը հասկանալու համար: Ամեն դեպքում, ժպիտով ասում է, որ երբեք ոչ մի թխվածք չի այրել:

Հրուշակագործության արվեստի վերջին միտումների մասին Ռենատն ինձ պատմեց հետևյալը.

«Ինչպես և նորաձևության ամեն տեսակ, սա նույնպես վերադառնում է:  Ինչ վերաբերում է տեսքին, ապա ամբողջ աշխարհում այն մեկն է՝ թխվածքը ծածկում են մարցեպանի շերտով և ավելացնում դեկորատիվ բաղադրատարրեր»:

Սակայն ինքը Ռենատը դա չի սիրում: Ոչ թե նրա համար, որ չի կարողանում, այլ նախընտրում է շոկոլադե թավիշ տեխնոլոգիան և պատրաստում է զարդեր, որոնք կարելի է ուտել: Շոկոլադն ավելի համեղ է և ապահով:

Հրուշակեղենի գլուխգործոցների բարդության վերաբերյալ հարցին  վարպետը պատասխանում է, որ երբեմն շատ ավելի դժվար է փոխզիջման հասնելը հաճախորդների հետ, քան արտադրություն ստանալը: Երբեմն հաճախորդները ծանոթ չեն լինում առանձնահատուկ տորթերի պատրաստման բուն գործընթացին, պահանջում են այն, ինչը կարող է բացասաբար ազդել ապրանքի որակի վրա, եւ նրանց պետք է համոզել: Բանակցությունների ավարտից հետո սկսվում է ստեղծագործական գործընթացը, որում Ռենատը հավասարը չունի:

Զրույցից հասկացա, որ վարպետի տորթերի արտադրության ժամանակակից տեխնոլոգիան արտերկրից է. Ռենատն այցելում է արտերկրում հրուշակեղենի առաջատար արտադրություններ: «Սիրելի Մոնա մի անգամ տեխնոլոգիան յուրացնելուց հետո ամեն ինչ հեշտանում է», – ասում է նա:

Կատարյալ տորթը տոնական սեղանին պետք է լինի ոչ միայն զարդ, այլեւ հյուրասիրություն, այսինքն՝ համը անկարևոր չէ. դա չի կարելի անտեսել: Հրուշակեղենի համի հարստության հարցում առանձնահատուկ դեր ունի միջուկը: Ագզամովը խոստովանել է, որ ավելի վաղ օգտագործել է մոտ 40 տեսակի միջուկ, սակայն հետագայում թողել է այս բազմազանությունը՝ վստահելով միայն իր յոթ ամենահայտնի ստեղծագործություններին: Ցավոք, ստիպված է եղել հրաժարվել համեղ սերուցքային այն տորթերից, որոնք տեղափոխման ժամանակ կամ սրահում տեղադրելուց հետո ջերմաստիճանի պատճառով ձևափոխվում կամ հալվում են:

Հայտնի գազարով տորթը պատրաստված է բիսկվիթից՝ ընկույզի, գազարի, չամչի եւ դարչնի համադրությամբ: Օգտագործվում է նաև սերուցքային հիմքով կրեմ՝ «Mascarpone» պանրով, թթվասերով եւ վանիլի հատիկներով:

Ագզամովն արտադրում է տորթեր, որոնք ունեն կրկնակի ալիքային ազդեցություն: Առաջինը հիացմունքի ալիքն է, որն առաջանում է, երբ  մարդիկ  բացում են տուփի կափարիչն ու իրենց առջև արվեստի ստեղծագործություն տեսնում։ Երկրորդ ալիքն առաջանում է տորթը համտեսելուց։ Շատերը կարծում են, որ հնարավոր չէ համատեղել հրաշալի համն ու հմայիչ տեսքը, ինչը, սակայն, հաջողվում է Ռենատի դեպքում։

Ի լրումն այս ամենի՝ նշենք, որ բացի տորթի տեսքի նորաձևությունից՝ կա նաև համի նորաձևություն։ Օրինակ՝ գրեթե ամեն ռեստորան իր ճաշացանկում ունի իր «Նապոլեոն» տորթը՝ հնարավորին չափ մոտեցրած տնական տորթերին, դուք կարող եք հաճախ հանդիպել  եւ համտեսել նաև «Թռչնի կաթ», «Մեղրով տորթ»։ Այսօր այդ տորթերը շատ սիրված են, որովհետև թթվասերային հիմք ունեն։

Ռենատ Ագզամովի պնդմամբ՝  տորթերը, որոնք պատրաստված են Ռուսաստանում, տարբերվում են Եվրոպայում աշխատող իրենց գործընկերների պատրաստածներից, բայց նա միայն երջանիկ է դրա համար, քանի որ նման ճանապարհով է պահպանվում ազգային ինքնությունը:

Սկսնակ հրուշակագործներին վարպետը խորհուրդ է տալիս կրկնօրինակման փոխարեն ուսումնասիրել մթերքները: Պետք է հասկանալ, թե ինչից են բաղկացած դրանք:  Միայն այդ գիտությանը տիրապետելուց հետո կկարողանաք սկսել թխվածքներ ձևավորել: Չէ՞ որ ամեն աղանդեր առաջին հերթին պետք է համեղ լինի:

Ռենատ, իսկ մաստեր կլաս չե՞ք պատրաստվում անցկացնել Հայաստանում:

-Հարգելի Մոնա, անկեղծ ասած քաղցրավենիքի ստեղծման թեմայով դասավանդում չունեմ, ինչով ես զբաղվում եմ դա բացառապես իմ մշակումն է և այն ”ինձ մոտ եմ պահում” ՝ իմ գլխում: Ես ունեցել եմ փորձ մաստեր կլաս անցկացնելու, բայց հիմնականում հաշվետարության, այս բիզնեսի տեխնիկական ու կարևոր մանրուքների մասին: Հիմա իմ աշխատանքային գրաֆիկը կազմված է ըստ րոպեների և դժվար թե կարողանամ հասցնել:

Իսկ Հայաստան պատվերներ ուղարկու՞մ եք:

– Մենք չգիտենք իմ գործերն ուր են գնում, հաճախ նաև պատվիրատուի անունն են գաղտնի պահում: Ես Մոսկվայից դուրս չեմ առաքում, սակայն լինում են պատվերներ, երբ ամբողջ կազմով գնում ենք այն տեղում պատրաստելու: Դրանք հաճախ մեծ նախագծեր են՝ 2-3 տոննա զանգվածով, 5-6 մետր բարձրությամբ: Ես կարծում եմ, որ այդպիսի պատվերները Հայաստանի համար դեռ առջևում են:

Ռենատին մաղթում ենք արվեստի  նորանոր գործեր և բարգավաճում:

fb4008

fb4444

Նյութի հեղինակ՝ Մոնա Գյուլասարյան 

Հարգանքներով՝ “MONA Luxury STUDIO” հանդիսությունների կազմակերպման գրասենյակ

Նյութի օգտագործումն այլ նպատակներով կամ այլ լրատվամիջոցներում արգելվում է

Նյութի աղբյուրը ՝ 24zham.am

Comments

comments